夏登轟43分難阻馬刺反Cup

馬刺昨天於NBA季後賽西岸4強作客以103比92擊落火箭，場數反超前2比1，李安納同艾迪列治分別攻入26分，正式「宣布」馬刺GDP時代落幕，因為除了真路比利得0分，鄧肯已經退役，柏加更加因Game2受傷收咧缺陣，GDP的影響力幾近等於零。

雖然柏加養傷，但馬刺並未落入下風，憑李安納拿下26分、10個籃板同7次助攻，艾迪列治亦有26分、7個籃板同2次助攻，協助馬刺反超前場數，而且真路比利上陣16分鐘，3投0中得5個籃板同2次助攻，加上鄧肯退役同柏加收咧，不少球迷認為GDP時代正式落幕。

另一方面，占士夏登有43分、2個籃板同5次助攻，可惜他在比賽尾段傳球失誤，斷送火箭最後爭勝希望，同時球隊全場攻入92分，屬於火箭今季得分新低，對上一次得分低於92分，已是上季季後賽不敵勇士的81分。

同日，騎士東岸4強作客以115比94擊敗速龍，場數領先至3比0，勒邦占士有35分、8個籃板同7次助攻，個人季後賽生涯第13次領先3比0，追平鄧肯的聯盟紀錄。另一方面，由於路維在Game3受傷被迫缺陣，即使迪羅辛有37分、2個籃板同3次助攻都救不到速龍。