珍惜當下 替工要變身奇兵 謝敏榮︰想有人為我鼓掌

花名「螳螂」的謝敏榮髮型「十年如一日」。

「唔講我都唔記得自己今年34歲，可能後生一輩球迷仲以為我係年輕球員！」那些年的髮型與《少林足球》會耍「螳螂拳」的閒角似到十足十，從此「螳螂」兩字便成了謝敏榮的代名詞。輾轉十數年間贏過聯賽冠軍、入選過香港隊，今時今日髮型依舊，縱然未嘗主角光芒，當東方龍獅在近兩場亞冠盃分組賽遇上傷停考驗，正正也是這位百搭老將，成為最佳「替工」人選。

其實早在2002年，謝敏榮已曾在未改制的亞冠盃舞台後備登場，昔日新丁曾經蓄勢待發，只是未及珍惜，已迷失在青蔥歲月中︰「諗番起當年一路走嚟都算順利，可能係咁冇去好好鍛煉自己，將時間用晒去玩、去飲酒。」

覓得至愛 酒徒變煮飯公

隨着「酒腳」陸續成家立室，「敏榮」亦向拍拖8年的中學同學女友「阿Lam」求婚成功，昔日酒徒竟變煮飯公！謝敏榮嘆道︰「阿Lam每次見到我飲酒都好擔心，到早幾年加盟東方，教練團不斷提醒我已再唔係十八廿二，再係咁飲落去，好難會踢番起。依家嘅我生活規律咗好多，練完波係時候去買餸幫手煮飯。」有了妳即使平凡卻最重要，就算去年再次膝傷長抖，依然咬緊牙關走過來︰「換轉以前應該攤咗喺屋企瞓覺，但依家會去做Gym舉鐵，每一次落場都會好好珍惜。大家覺得我嘅性格冇乜所謂，好處就係唔會諗嘢鑽牛角尖，遇到唔順境時刻都唔會畀自己『hea』落嚟。」別忘了「螳螂」還有另一花名叫「牛榮」——不會輕易低頭認命！

經歷「迷失」歲月，謝敏榮學懂珍惜當下。

謝敏榮（右）頂替迪高（左）於亞冠盃上陣。