葉鴻輝︰學Rex對抗逆境
香港拳王曹星如咬緊牙關締造21連勝神話，牽動全港市民心。東方龍獅門神葉鴻輝與不少本地球員前晚親臨會展為Rex打氣，期望東方龍獅於亞冠盃也能發揮Rex的永不放棄精神，抵抗亞洲列強。
「我哋足球員都要爭氣」
已是第3次現場為阿Rex打氣的「英雄輝」，聯同曾錦濤、梁振邦等東方龍獅隊友撐場。他直言睇得相當肉緊，甚至有擔心過阿Rex會輸︰「中間有幾個回合見佢都好傷，好似畀人打到冇晒focus，但係阿Rex真係好捱得。見到有香港運動員有咁嘅成就，開心之餘，我哋足球員都要爭氣。」
雖然「英雄輝」與阿Rex惺惺相惜，但他坦言對方大戰過後需要休息，故未有邀請他在明晚入場觀看東方龍獅對水原三星藍翼的大戰，並祝福他盡快恢復體力，繼續在擂台上打拚。