黑腳古辛斯爭氣威番鋪
NBA周一賽事，塘鵝作客以105比97擊敗湖人，古辛斯攻入26分，終於取得加盟以來首場勝仗，擺脫球迷心目中佗衰家「黑腳」形象。另一方面，湖人遭遇7連敗，繼續位列西岸包尾。
古辛斯加盟塘鵝後，頭4次上陣全部輸波，期間球隊唯一勝仗擊敗活塞，竟然係因為佢停賽。或許因此緣故，古辛斯面對湖人打得更加落力，個人獨取26分、15個籃板，以及2次助攻，加上「一眉」安東尼戴維斯貢獻31分、9個籃板及2次助攻，最終協助塘鵝重響勝鼓。
相反，歷克楊格取得19分及4個籃板，唔足夠改變湖人7連敗嘅厄運，而且「紫金兵團」今季戰績慘錄19勝43負，繼續位列西岸包尾，難怪近日有報道指出，湖人教練禾頓帶埋工作人員去睇NCAA，打算喺2017年選秀會上，揀番個啱心水球員做湖人救世主。
「浪花兄弟」着火勇士挫紐約人
同日，勇士作客以112比105擊敗紐約人，雖然史堤芬居里開波後連炒4個三分球，不過最後自我救贖取得31分、8個籃板及6次助攻，包括射入5個三分球，加上隊友奇利湯臣亦有29分、4個籃板進帳，結果「浪花兄弟」合力交出60分，帶領勇士終止2連敗。