今季有機會代表港會參與港超聯，當然非常開心，可以話係圓咗自己嘅兒時夢想。對我嚟講今季係一個新嘗試，喺香港踢最高水平嘅聯賽，可以知道自己嘅水平同有咩不足，然後再努力改善。
中學同大學嘅我都喺澳洲讀書，所以無咩機會接觸到香港職業足球。不過依家踢咗半季，我覺得港超球隊比較着重用波同比賽戰術，澳洲足球戰術相對簡單，反而比較注重體力化同身體對抗性。
港會係一間非常有規模嘅球會，有自己嘅球場，設備完善，教練團亦都好專業。一星期操練至少三課，每次練習都有針對性安排，所以無論係體能、技術、走位、用波同球員之間配合等等，自己感覺比之前提升咗唔少。個人今季目標當然係爭取到球隊正選位置，不過始終我今年先第一年踢港會，配合方面一定唔及舊隊友，要爭取正選一定有難度，要啲時間去爭取。今季落場時間唔算多，所以平時一定要好好去準備，生理同心理都係，一有機會落場就傾盡全力，最緊要唔好令自己後悔！
港會後衞 黃榮傑