勇士炒到拓荒者扯白旗

勇士喺第1節已經領先18分，最後杜蘭特獲34分、11個籃板及4次助攻，史堤芬居里同奇利湯臣分獲19及16分，協助勇士以45分之差大炒對方，連贏4場。事實上拓荒者官方twitter都輸到尊嚴盡失，當佢哋以36比62落後嘅時候，竟然逃避現實話勇士「只不過領先些少分」，但隨住比分愈拋愈遠，有拓荒者球迷喺勇士官方twitter留言，出扯白旗圖求饒「請你停手」，今勻認真「輸人又輸陣」 。

潮韋食第50鋪「大三元」

同日雷霆喺主場以114比101擊敗太陽，「潮韋」韋斯布克食出「大三元」，獲26分、11個籃板及22次助攻，除創出個人職業生涯單場助攻數字新高外，亦係史上第3個最快達到50次「大三元」嘅球星，僅用咗614場比賽就完成呢個創舉。