24個三分球破紀錄 火箭屈死塘鵝
NBA昨晨大戰連場，當中火箭主場迎戰塘鵝，最終火箭贏122比100，順利取得9連勝。今場火箭外線威力驚人，全場61投24中，打破半場、全場三分起手次數及單場三分命中次數紀錄。艾歷哥頓27分鐘轟入7球三分波，全場貢獻29分，今場比賽過後，哥頓一共投中100球三分波，比史堤芬居里只少一球，但命中率卻比後者高出4%，可以話係現役最強三分王！
今場另一主角占士夏登交出「大三元」成績，一共得29分、13助攻及11籃板，職業生涯第15次食出「大三元」，亦令佢打破隊史紀錄！塘鵝方面，安東尼戴維斯下半場因傷退下火線，離場前得19分及5籃板。
林書豪復出 籃網唔爭氣
同日，籃網作客以111比118不敵魔術。林書豪今場復出，後備上陣表現理想，上陣唔到20分鐘，就有17分、3籃板及3助攻進帳，隊友布克盧比斯就交出22分、6籃板及5封阻。今場籃網開段一直領先，不過第2節已被追過，半場以52比53落後，最終未能贏波而回，魔術方面科尼亞拎到全隊最高嘅21分。
另外公牛主場對公鹿，公牛喺只得2個球員得分達雙位數情況下，命中率亦低到得三成，結果大敗69比95，連續兩日輸畀公鹿，錄得今季首次3連敗。