10射全炒累勇士負湖人 居里3分波紀錄斷纜
勇士昨晨在NBA作客以97比117慘負湖人，「咖喱仔」史堤芬居里貢獻13分、8個籃板同11次助攻，數據上不算太差。不過，史堤芬居里全場17射5中，包括三分球10射「全炒」，個人連季後賽連續196場（常規賽連續157場）入三分球的NBA紀錄告終，相信「咖喱仔」都很難相信自己會突然離奇失準。
史堤芬居里突然失準，拍檔奇利湯臣亦相當慘情，面對湖人僅得10分、3個籃板同1次助攻，當中3分球10射2中。奇利湯臣開季後6場比賽，3分球46射竟然得9中，命中率係非常可憐的19.5%，連美國傳媒都覺得「浪花兄弟」這個稱號應該就此「玩完」。
不過，賽後避談自己失準的居里，強調自己會繼續射三分波，並謂「唔同嘅賽季有唔同目標，我哋要專注嘅唔係破上季紀錄，依家我哋要做嘅係喺今季完成我哋嘅新目標。」
禾頓倒戈贏波嗌過癮
至於湖人教練禾頓就承認倒戈擊敗勇士非常過癮：「我下午已經收到積蒙格連嘅垃圾話短訊，如果我哋輸波，肯定有排畀對方笑。而且我好鍾意見到卡爾（勇士主帥）發嬲，我唔會好似其他人咁，搏晒命咁阻止佢鬧球證，即使有，都只係作狀做吓樣。」
同日，紐約人作客以117比104擊敗公牛，戴歷羅斯首次倒戈雖被公牛球迷勁噓，全場16投僅6中，但他仍取得15分、7個籃板同11次助攻，加上安東尼貢獻25分、7個籃板同4次助攻，協助球隊結束連敗走勢。公牛雖有韋迪交出35分、10個籃板同1次助攻，但仍要遭遇2連敗厄運。
