戰車着火退賽黑帝躁爆怒插車隊
「黑帝」壞車發爛渣！正同隊友洛辛保爭奪一級方程式總冠軍嘅英國車手咸美頓，於馬來西亞站跑到第40圈，戰車突然引擎着火，被迫退出比賽！車手榜「1哥」洛辛保今站排「紅牛雙雄」列卡度及韋斯塔本之後得第3，但總成績同咸仔拉開到23分差距，難怪咸美頓公開炮轟車隊：「平治咁多部引擎，次次都係我有事，根本有人唔想我贏！」
今站意外多多，但大部分都關「平治雙雄」事，排頭位出賽嘅洛辛保起步即同維度爾炒車，一開波就跌落21位，咸美頓、列卡度及韋斯塔本喺前面鍊餐飽。到第40個圈，咸美頓戰車突然噴火，畫面驚險，「黑帝」欲救無從，喺仲有16圈賽事被迫退出，而洛辛保最終後上以第3名過終點。紅牛嘅列卡度2年嚟首次贏得分站冠軍，隊友韋斯塔本第2。
「有人唔想我贏」
洛辛保總成績以288分領先，今站0分嘅咸美頓以265排第2，對爭取總冠軍打擊極大，咸美頓賽後接受《英國廣播公司》訪問時忍不住插爆車隊：「我心底真係有問題問車隊，平治有咁多引擎畀車手，點解今年出親事都係我。唔該搵人畀答案我，真係好難接受，點解淨係我架車有事，我依家係爭緊總冠軍！」咸美頓愈講愈燥：「我覺得根本有人唔想我贏，但我唔會認輸，我會戰鬥到底。」