經過今屆里約奧運之後，菲比斯歷來個人奧運獎牌已累積多達28面，當中有25面金牌，喺游泳池裏面絕對所向披靡。而且，佢仲多次成為《體育畫報》封面人物，所以影封面相已經好有經驗！而今屆奧運攞到4金1銀、歷嚟第2位單屆奧運包辦最長程3項自由泳金牌嘅19歲新星列迪姬，就係第一次幫《體育畫報》影封面相！
列迪姬勢成美國泳壇新Icon
喺拍攝前，三位金牌選手將自己今屆奧運攞到嘅獎牌，全部掛晒上頸。經驗豐富嘅菲比斯見到小師妹列迪姬雞手鴨腳，就親自教佢點樣擺靚獎牌，仲叫佢唔使擔心，慢慢就會學識，暗示呢位繼自己之後，最大機會成為美國泳壇代表人物嘅超新星，將來會有大把獎牌攞呀！