女足4大美人閃爆綠茵場
奧運女足「美麗任務」，4大美人領軍，場內爭金、場外搶鏡，各懷絕技要贏波兼俘虜男人心！今屆奧運女子足球，美女雲集，美國射手雅歷絲摩根性感火辣，法國中場妮絲比秀外慧中，德國新星戴比莉絲青春逼人，當然唔少得國產長腿靚女趙麗娜。球場艷光四射，吸睛指數爆燈，勢必好波連場，各位男球迷萬勿錯過！
３冠女王妮絲比
妮絲比擁有阿爾及利亞血統，而且都係司職中場指揮，因而被譽為「女施丹」。事實上，妮絲比的確係天生冠軍人物，曾率領里昂女足9次奪得聯賽冠軍及3次歐聯錦標，上季亦贏埋法足盃，成為「三冠女王」。妮絲比喺場上表現冷靜，因而被稱「冷美人」，最重要係佢傳送精準，似足持家有道嘅賢妻良母，奠定球隊精神領袖地位。法國女足今屆以最強女子球會里昂人腳為班底，默契十足，有力問鼎金牌。
氣質女孩戴比莉絲
德國男足勁、女足俏！21歲新星戴比莉絲冒起，為一向「男子氣」嘅德國女足，增添一份可愛色彩。3年已進身大國腳嘅戴比莉絲，天才橫溢，喺2014年女子世青盃射入5球，協助德國奪冠。呢位充滿鄰家女孩氣質嘅小妹妹，傳射能力固然出眾，但最煞食都係一副甜美笑容，又經常喺球場發放笑蛋，為隊友帶來歡樂。一向盡收天下兵器嘅拜仁慕尼黑，上年將戴比莉絲收歸旗下女子隊，證明Sara已達頂尖級數。德國女足過去4屆奧運有3屆屈居亞軍，今屆可唔可以打破二奶命，就要睇戴比莉絲。
人氣寵兒雅歷絲摩根
講到最索女足球員，第一時間肯定諗起雅歷絲摩根，呢位27歲前鋒擁有一張荷里活明星相，以及勻稱身材。佢亦好識發揮「天賦」，經常為雜誌拍攝性感照片，甚至試過一絲不掛做人體繪畫，球壇首席性感女神美譽當之無愧。雅歷絲摩根人氣持續高企，成為廣告商寵兒，擔任多個國際品牌代言人，可以話係「女版C朗」。雅歷絲摩根仲係一位才女，曾經出版兒童書籍，更成為學校參考書。球場上，雅歷絲摩根一樣係主角，協助美國女足奪得上屆奧運金牌，以及上年世界盃冠軍，場內場外都畀佢玩晒！
長腿門神趙麗娜
身高1米88嘅趙麗娜擁有超模身材，其44吋長腿，唔止令佢喺禁區內高人一等，更迷死唔少宅男。呢位「長腿門將」自上年年初嶄露頭角後，立即成為網民起底對象，人氣隨之急升，有雜誌搵佢同幾位隊友到北戴河海邊影咗輯性感靚相。趙麗娜好鬼疏爽，狂露事業線同長腿，睇到男粉絲如痴如醉，獲封為球壇「Angelababy」。中國女足自「孫雯時代」打入1996年奧運及99年世界盃決賽後，就未再喺國際大賽威過。慶幸近年新生代有姿勢有實際，上年世界盃打入8強，趙麗娜艷光照射下，能否令「鏘鏘玫瑰」再度盛放，大家拭目以待。