港足神獸預測3:1 貼法國捧歐國盃
自從八爪魚保羅神機妙算百發百中後，每逢大賽均有「神獸」湊熱鬧，爭做動物界「估神」。港隊10號仔林嘉緯與靚仔門神謝德謙雙雙看好法國於今晚歐國盃決賽主場登基，兩人的心肝寶貝—靈犬「芝治」與神龜「大白」就各撐一隊，比數3比1，莫非東道主今晚捧盃之餘，再中埋3比1波膽？
歷屆歐國盃未嘗有球隊主場封王，相反葡萄牙一路走來鴻運當頭，林嘉緯與謝德謙卻唔多信邪，齊齊看好法國捧盃。「阿謙」表示：「葡萄牙好運多過好波兼走條靚線，至於法國喺分組賽對手唔算太強，但8強大勝冰島同4強淘汰德國都盡顯霸氣，始終都係希望實力較高一隊捧盃。」
大龜作對 謝德謙冇癮
傳說龜龜充滿靈性，熱愛爬蟲類動物的謝德謙便從他的心肝寶貝陸龜「4兄弟」中，挑選了最大隻的「大白」發功。不過「大白」似乎對同樣大隻的「C朗」情有獨鍾，選了3次都是選擇葡萄牙國旗上的龜糧開餐，搞到「阿謙」勁冇癮：「大白平時好鍾意食嘢，一見到我就頭望望，佢咁鍾意葡萄牙，可能貪葡萄牙同佢一樣咁鍾意食—食運!」
「嘉緯」靈犬揀啱心水
「阿謙」與大白打對台，另邊廂的「嘉緯」則與愛女—金毛尋回犬「芝治」心靈相通，皆因芝治眼神堅定，不用「嘉緯」指揮已一支箭衝向法國國旗，向他「致敬」，如此清楚「Daddy」心水，難怪「嘉緯」錫到佢燶！「嘉緯」除了力撐法國，還看好神鋒基沙文奪得神射手寶座：「皮耶喺今屆頭幾場比賽搶盡風頭，自己則一直好欣賞基沙文，佢喺馬體會已經盡顯入球能力，法國國家隊嘅穩守突擊戰術，正好需要呢類把握力強嘅前鋒，將對手一劍封喉。」
「嘉緯」已相約好友一起睇波，最佳地點當然是留在家中，預埋芝治及細佬「蝦頭」開Party。至於幾乎每晚在「公仔箱」陪大家睇波的「阿謙」，殺入屯門主持睇波活動後，翌日早上11時便要回到跑馬地練波，下午又要錄影節目，難得他仍精神奕奕：「可以認識到電視台運作同考驗做live應變能力，對我嚟講係非常難得嘅體驗。不過冠忠南區就嚟開操，係時候養足精神，好彩只係捱多一晚眼瞓，點都要睇埋決賽嘅！」