港超挑攝賽頒獎喇喂！

Rainbow Store–Camera負責人、「港超挑攝賽」首席評審黃銘成（Peter），一直也是本地波支持者，更是標準擁南躉。Peter在今次「港超挑攝賽」出錢出力，贊助了三甲獎品和現金獎，原來近兩季港超聯宣傳拍攝，包括香港隊的型仔照，他亦都有出「燈」出力，落手落腳支持。「本地波沉靜咗太耐，近幾季開始多番啲人留意，搞多啲唔同嘅宣傳，大大小小、咩規模都好，咁先可以令到更多人認識。所以嚟緊『我撐本地波』再搞攝影比賽，我都一定會全力支持！」Peter，多謝支持！

黃銘成出錢出力撐本地波

至於齊齊身穿愛隊或支持球員球衣出席頒獎儀式的三甲得主，從Peter手中接過包括Godox閃光燈等獎品後，無不喜上眉梢。身穿羅拔圖東方球衣的冠軍Micheal Shum，對於能夠在接近40幅參賽作品中脫穎而出感到興奮，認為舉辦多些供球迷參與的比賽，有助推廣港超聯。「可以落到球場影球隊比賽就梗係好啦！不過，好似今次『港超挑攝賽』咁都搞得唔錯，下次再有我都一定會參加。」

因與趙俊傑分屬好友，因而全力支持灝天黃大仙的Ray Fung，身穿的卻是王景華的球衣，他說：「我睇本地波咁耐，都係第一次開口問球員攞波衫，嗰日王景華完場之後就掛靴，我心諗咁有紀念價值咪問佢攞囉，好開心佢真係送畀我。我為咗着得落，呢幾日都無乜點食嘢！哈！哈！」Ray Fung認為本地波球迷中，有非常多攝影發燒友，相信下一次的「港超挑攝賽」，將會有更多球迷朋友參與。

在本地球圈與「炎煞黑龍波」齊名的Man Lap Chi「肥牛」，乃傑志死忠，對於愛隊今季的成績，他以「都唔錯啦！」來形容，他說：「始終上半季唔係太順，之後『朱Sir』（即足球總監朱志光）接手已經好番好多，不過無法啦！捧番個聯賽盃都好好喇，下季再嚟過啦！」「肥牛」提到其作品拍攝當日，乃最凍的決賽日（高級組銀牌決賽），相中老人家冒寒揮旗支持冠忠南區，讓旁人感動。