踏入5月尾，歐洲各大足球聯賽及盃賽均名花有主，今日不如crossover去NBA，傾傾季後賽形勢，預計總決賽會由西岸「雙英」雷霆或勇士，火併由「呂布」勒邦占士帶領嘅東岸勁旅騎士。先講東岸，騎士可謂一枝獨秀，今季季後賽頭10場全勝，包括東岸決賽場數已領先速龍2比0，殺入總決賽機會好高。隨住艾榮及路夫擺脫傷患困擾，勒邦占士不用再像上季般單天保至尊，以筆者睇NBA數十載嘅觀察所得，每支冠軍級球隊總有2、3名球星壓陣，加上騎士早早鎖定季後賽資格，教練亦讓勒邦占士等主力喺常規賽尾段抖抖，養精蓄銳打季後賽，難怪依家所向披靡。