杜蘭特大爆發搞喊阿媽
NBA季後賽西岸4強大戰，雷霆主場以111比97擊敗馬刺，總場數追和2比2。雷霆當家主將杜蘭特於母親節大爆發轟入41分，包括於比賽尾段孭起得分責任帶領球隊贏波，令到在場邊為他打氣的媽咪又叫又跳，賽後甚至感動流淚，「乖乖仔」杜蘭特更揚言Game 5會繼續贏波獻給媽媽！
杜蘭特今仗取得41分、4次助攻同5個籃板，加上韋斯布克亦有14分、15次助攻同7個籃板，造就雷霆場數追平對手，重燃晉級希望。馬刺方面，李安納有21分、2次助攻同6個籃板，艾迪列治有20分同6個籃板，但始終未能帶領馬刺得勝。
自小在單親家庭長大的杜蘭特賽後表示：「能夠喺母親節贏波，真係太好。我美麗嘅媽咪就喺場邊，佢喺季後賽入場睇波，關注我嘅比賽，呢種感覺非常好，跟住佢都會入場，我希望下場比賽佢一樣睇到我哋取得勝利。」Game 5將於香港時間周三早上移師馬刺主場上演。
騎士橫掃鷹隊 搶閘入東岸決賽
同日東岸4強，騎士作客以100比99一分之差險勝鷹隊，總場數4比0橫掃對手進身東岸決賽。「大帝」勒邦占士取得21分、9次助攻同10個籃板，拍檔路夫有27分、4次助攻同13個籃板，包括3分15投中8，協助騎士躋身東岸決賽。
