各大勁旅為爭標鬥得頭崩額裂，護級組形勢同樣緊湊，榜尾球隊按賽制將降至甲二作賽，梁國成雖然將福建和飛鷹排除在爭標行列，但仍相信這兩隊能跟強隊一戰：「福建嘅情況同東方有啲似，狀態比較波動，球員各自都有能力，但磨合唔夠變成各自為戰，但主力司徒偉傑攻守兼備，蘇尚瀛同余耀明亦有得分能力，至於飛鷹替補球員唔多，得分點亦集中喺高榮生身上，佢甩骹對球隊影響好大，還好飛鷹『高佬』雲集，可靠身高搶回優勢。」
至於重新磨合的晉龍WTS，梁國成認為該隊雖然經驗不足，但陣中年輕球員都有實力，可望力壓遊協，保住甲一席位！「晉龍WTS陣中唔少好球員，好似蔡育霖同張智衡都有唔錯嘅得分能力，但佢哋得分點好散，而且經驗唔夠，間唔中出現失誤，有必要加強防守能力！遊協雖則經驗豐富，但球員各自有工作，齊腳練波已經好難，對手只要稍有變陣，遊協勢難作出反應！」