C朗大晒水療室

C朗趁皇馬會長皮里茲前往美國做手術，乘機作反，唔理禁令，又飛去摩洛哥同拳擊好友巴德哈里歡度假期。恐怕皮里茲返回馬德里後，又會搵佢「照肺」，令雙方關係進一步惡化，再咁搞落去，C朗或者真係會考慮走人。

皇馬上仗大炒愛斯賓奴「6蛋」後，教練施丹批准全隊放假兩日，加上會長皮里茲去咗芝加哥接受頸椎骨手術，C朗立即把握機會，又去見巴德哈里。皮里茲早前唔准C朗成日飛去摩洛哥，呢位葡萄牙國腳有所收斂，估唔到皮里茲一離開馬德里，C朗又故態復萌，肯定激死皮里茲。

C朗除咗鍾意同巴德哈里相聚外，亦喜歡晒豪宅，佢又拍片帶球迷「參觀」自己間大屋，今次主要介紹特大水療室，包括兩個按摩池、1個泳池，毛巾仲有CR7字樣，唔講仲以為佢開咗間會所。

另外，西班牙《每日體育報》爆料，指加里夫巴利加盟皇馬近3年，仍然唔識講西班牙語，皆因唔願學，依家只可以同前熱刺隊友莫迪歷傾得埋。