咖喱仔負傷照贏騎士
「咖喱仔」史堤芬居里三分球準到核爆，但竟然遭前教練馬克積遜批評打法教壞細路，隨時摧毀籃球下一代！不過「咖喱仔」未受影響，昨日於聖誕矚目大戰雖帶傷上陣，但仍帶領勇士主場以89比83擊敗有「大帝」勒邦占士、路夫及艾榮領軍的騎士，讓勇士球迷有一個快樂聖誕。
居里小腿受輕傷困擾，今戰比賽期間一度要離場接受治療，上半場7射僅2中，全場只得19分。不過，他於第4節末段關鍵時刻連取4分，為球隊奠定勝局。勇士前鋒積蒙格連愈打愈有信心，是役交出22分、15個籃板球及7次助攻的高效率表現，讓球隊全場Lead住由「三巨頭」齊腳搏殺的騎士，成為勇士贏6分的一大功臣。勇士現時戰績為29勝1負，美國傳媒再次熱議球隊可否挑戰公牛的72勝紀錄，以及居里對籃球的改變。
居里打法有讚有彈
勇士前教練馬克積遜似乎對「咖喱仔」唔多認同，更在今仗為電視台旁述時直指居里打法教壞細路：「居里正在傷害籃球，之前我睇高中比賽，見到班年輕球員全部都淨係射三分。小朋友，你唔係居里，去練下基本功先啦！」對於指摘，「咖喱仔」笑着回應：「如果你射得入咪繼續射囉，如果唔夠準咪唔好射囉。」美國最大型的業餘運動組織AAU高層森摩西斯就力撐居里，認為「咖喱仔」讓更多年輕球員明白，就算身形矮小亦可躋身NBA，而且AAU旗下的籃球小將，集中學習居里的運球技巧，反指馬克積遜的指摘不實。