翠如BB甜過「唐詩」!

「英雄輝」平時在球場左飛右撲,決斷力慢少少都唔得,究竟球場以外嘅選擇題,阿輝又會點揀?

保方Vs卡斯拿斯

A:我鍾意保方多啲。保方除咗反應夠快,位置感亦係冇得頂,所以即使依家年紀大咗,表現依然咁穩定。不過我偶像其實係舒米高同雲達沙,佢兩個同保方一樣都係龍門長青樹,希望到我三十幾歲時,依然可以Keep到咁勁。

李健和Vs金判坤

A: 「全盛時期」可以話係嚴厲得不相伯仲。不過近年兩位教練都收咗唔少火,Kim Sir經常鼓勵我哋唔好怕輸,李Sir教青年軍亦唔似得以前咁喪鬧,依家班後生仔真係幸福好多。

陳偉豪Vs李志豪

A:一定要揀一個做隊友?可唔可以兩個都要晒!呢幾年我哋幾個一齊經歷得太多,由東亞運金牌、廣州亞運、南華,我哋3個都喺後防配合得天衣無縫。雖然依家喺球會分道揚鑣,絕無影響我哋友情同默契。

東方Vs南華

A:南華係令我成長嘅踏腳石,畢竟踢南華嘅壓力同其他球隊係唔可以比較。至於我同東方則係特別嘅緣分,當年我喺東方只得18歲,依家雖然亦差唔多係全隊最年輕,卻多咗隊長身分帶來嘅責任感。

黃翠如Vs唐詩詠

A:我又唔係洪永城,叫我點揀?其實我鍾意煲美劇多過睇港劇,不過兩個揀一個嘅話,我會揀「翠如BB」,點解?因為笑得夠甜囉!