咖喱仔笠頭避粉絲

勇士控衞史堤芬居里昨日主場對灰熊一戰中又有神級演出,攻入全場最高30分,助球隊以119比69狂數對手,令灰熊蒙受球隊史上最大敗辱。咖喱仔現時人氣爆燈,想偷閒陪老婆行街,亦要戴斑馬頭套掩人耳目。不過,人氣之王喬裝出巡都無用,仍然被一大班粉絲狂追,咖喱仔魅力果然沒法擋!

勇士今仗防守嚴密,令灰熊全場命中率僅得27%,只有馬克加素及康利得分達雙位數。勇士於第2、3節轟入72分,成為今仗大勝負關鍵,終以大炒灰熊50分。全場16射10中的史堤芬居里,賽後對球隊能夠大勝50分感到驚訝:「好意外,我唔記得我哋有邊場試過贏對手咁多分。」咖喱仔現在狀態大勇,人氣亦係一時無兩。這位27歲球星日前跟老婆去商場購物時,吸引大量粉絲追隨,更要特地戴上斑馬頭套,不過仍未能阻止Fans跟住他和家人一齊「行街」。居里人氣超強,成為聯盟巨星的他,想繼續低調生活看來不易。

占士達25,000分里程

另外,騎士昨日作客以107比100擊敗76人,勒邦占士攻入22分,令他成為聯盟史上最年輕累積25,000分的球員;其波鞋贊助商NIKE,將會為他推出特別版波鞋作紀念。占士賽後謙稱達成壯舉多得眾人幫助:「呢個里程碑代表我同過好多好隊友,好教練一齊並肩作戰。我喺幾隊好球隊打過波,所以先可以有呢個成就。前路仲好漫長,但係達到呢個里程碑,感覺真係好正。」