太陽飛馬踢完仙至算
太陽飛馬早前傳出季後易主嘅消息，太陽飛馬總監兼主教練CowSir陳志康尋日主持操練後話：「現階段仲未有嘢可以公布，但相信球員都會識得諗，會好好去踢剩低嘅比賽，用表現去吸引球隊嘅『買家』或者其他球會。」CowSir亦話佢季後會專心發展太陽國際體育會嘅工作。
加盟太陽飛馬之後一直用入球證明身價嘅前波斯尼亞國腳拉斯錫亦都有嘢講：「球會易手在即，我同隊友都好唔捨得，但好多嘢唔係可以控制到，我哋唯一可以做，就係珍惜餘下着住太陽飛馬波衫比賽嘅機會，只有咁樣，先可以無憾！」
黃大仙方面，多名球員今季表現出色，大踢爭氣波，因而吸引到其他球會嘅垂青，今日主場謝幕，為己為球隊，肯定唔會咁易放過對手。