記得06年多哈亞運期間寫過一篇手記，內容提到要採訪滑浪風帆，有機會乘搭快艇暢遊波斯灣，仲話覺得自己做咗占士邦添，估唔到班同事咁上心，今次仁川亞運，竟然叫小弟做「占士崑」。
其實係男士都崇拜占士邦，靚仔風流、身手敏捷、無限金錢、仲有M夫人或達文西提供高新科技裝置，上天入地，否則占士邦電影唔會拍咗幾十年，長拍長有，同類型虛構偶像仲有好多，例如科幻小說主角衞斯理、古龍武俠嘅陸小鳳，仲有早幾年嘅變身特派員只野仁。
不過咁，由於科技普及，依家做傳媒真係好似做緊占士邦，例如早排伊巴謙莫域來香港，小弟就要全天候監視及追蹤，今次採訪仁川亞運會，帶來嘅裝備器材都唔嘢少，淨係智能電話都有3部，加埋相機電腦，現場比賽相片同訪問即時傳送，一個人可以做多幾樣嘢。
每晚返酒店房間休息，所有電子器材一齊叉電，通地電線，咪以為係秘密基地，如此裝備，今時今日只係基本嘢。
馬田＠仁川