首爾恃強打劫流浪者
亞運足球喺仁川打得如火如荼之際，唔好忘記今晚同樣喺南韓有另一場重量級大戰，就係亞冠盃四強首回合，由南韓班霸ＦＣ首爾主場迎戰澳職勁旅西悉尼流浪者，後者上圈雖淘汰上屆盟主廣州恒大淘寶（ＦＣ廣州），但今仗有射手杜米祖歷等三大主力「坐波監」，加上聯賽又未開咧，狀態始終差啲，梗係捧番ＦＣ首爾先拔頭籌喇！
（now 670周三晚6時30分直播）
流浪者3主將停賽
西悉尼流浪者八強戰被一致睇淡下，兩回合計以2比2賽和上屆盟主恒大，憑作客入球優惠進身準決賽，令人刮目相看。不過，佢哋亦付出沉重代價，兩大箭頭杜米祖歷、辛達利比及後衞沙朗高爾因為黃牌夠數，今仗要自動停賽，其中杜米祖歷上圈兩回合都取得關鍵士哥，冇咗呢把銳利尖刀，令前線反擊力大削，今場作客惟有死守不出。
由於澳職尚未開咧，西悉尼流浪者最近一次踢嘅正式賽事，要數到八月尾淘汰恒大之役，難怪教練普波域都承認眾將狀態點都唔及ＦＣ首爾。的確，ＦＣ首爾一直有聯賽踢緊，並且連勝三場弗到震，日前喺聯賽擊敗仁川聯，仲特登收起射手艾斯古迪路等主力，西班牙中堅奧斯馬巴巴亦只係踢咗半場就被換出，擺明留力戰亞冠；ＦＣ首爾無論狀態、體力、人腳均勝一籌，勢必趁主場之利搶韁爭勝，主W有1.62倍咪嫌少。