籃球世界盃月底假西班牙開打，力爭衞冕嘅美國男籃昨日首度進行公開對抗賽，溜馬前鋒保羅佐治（Paul George）喺尾段「中招」，右腳脛骨同腓骨嚴重骨折，新季NBA幾乎肯定唔使預佢。美媒事後炮轟美國籃協選址唔合乎規格，係累死保羅佐治嘅元兇，美國籃協今次唔單止激親溜馬，一眾NBA球星更隨時唔敢再為國效命！
美國男籃20人大軍昨日喺拉斯維加斯進行對抗賽，保羅佐治喺第4節初段封阻占士夏登（James Harden），但因為落地唔好導致右腳小腿90度屈曲，場面極之恐怖。占士夏登當堂驚到唔敢睇，艾榮（Kyrie Irving）更嚇到喊咗出嚟，至於保羅佐治老竇更緊張到衝去場邊安慰阿仔。美國男籃即時終止練習賽，保羅佐治接受大約15分鐘治療後送往醫院進行手術，醫生其後證實呢位溜馬前鋒右腳脛骨同腓骨骨折，已將鋼釘鑲入串連，要留院2至3日。
以「大帝」勒邦占士（LeBron James）為首嘅球星紛紛透過twitter祝福保羅佐治，身處上海嘅高比拜仁（Kobe Bryant）更打長途電話慰問。《ESPN》記者雲賀斯炮轟美國男籃選址有問題，指呢個Thomas & Mack中心唔合乎規格，籃球架同邊線距離太近，令保羅佐治落地後要避開籃球架而釀成今次意外。
至於孭晒鑊嘅美國籃球協會主席高蘭謝路（Jerry Colangelo）即時宣布美國隊停訓一周，最後名單亦會押後公布。高蘭謝路更已致電溜馬班主西蒙（Herb Simon）交代情況，溜馬總經理布特（Larry Bird）則發聲明表示「關注保羅佐治傷勢」。
據《今日美國》報道，有NBA球隊班主及總經理召開緊急會議，計劃唔再畀陣中球星為國效命！
保羅佐治尋日就透過twitter「報平安」：「我會以更強姿態重返戰場！」《ESPN》首席醫學專家卡普蘭預計，保羅佐治有可能要休戰9至12個月，即係來季NBA基本上唔使預佢，加上史堤芬遜（Lance Stephenson）已轉投黃蜂，溜馬新季隨時係咁先！
勒邦占士(騎士前鋒)：一落機就聽到呢單消息，祝迅速康復！
杜蘭特(雷霆前鋒)：天佑保羅佐治，希望上帝賜予力量，令你盡快康復。
甘巴獲加(山貓控衞)：見到一個好人兼好球員受重傷實在令人氣憤。
迪安迪佐敦(快艇中鋒)：祝保羅佐治早日康復，我們都在你身邊。
蘇寧加(塞爾特人前鋒)：祝福保羅佐治。我冇睇到亦唔想睇番佢點傷，請唔好喺網上Post條片出嚟。
奇雲韋爾——上年NCAA 8強戰，路易斯威爾後衞奇雲韋爾（Kevin Ware）飛身封阻對手，落地之後右腳小腿骨折，骨頭穿破皮肉，足足休戰超過1年。
伊度亞度達施華——2008年2月為阿仙奴喺英超披甲鬥伯明翰，「兵工廠」前鋒伊度亞度達施華被對方守將馬田泰萊剷到左腳小腿骨折，休戰近1年。
施斯——2004年効力利物浦嘅施斯，英超對布力般被踢斷左腳脛骨同腓骨，休戰5個月。兩年後代表法國喺熱身賽鬥中國，被鄭智意外踢到右腳骨折，又抖半年。