尹戈爾紅魔頭炮打得響

「新魔王」尹戈爾有望開個靚頭!英超賽會尋日公布2014-2015球季賽程,帶荷蘭征戰完世界盃後就會接手曼聯嘅尹戈爾,運氣睇嚟好過「過氣魔王」莫耶斯好多倍,頭5輪賽事對手全部唔算勁,要開個靚頭唔係難事,反觀同市宿敵、衞冕球隊曼城就惡啃得多,頭5輪有3場係對住利物浦、阿仙奴同車路士,其中第2輪主場鬥利記,更係季初首場大戰!

曼聯頭5場冇硬嘢

英超新一季會喺香港時間8月16日正式開打,而曼聯新帥尹戈爾首輪就喺主場對住史雲斯,有望打響頭炮,其實曼聯上季首輪賽事都係對史雲斯,但係跟住冇耐就要大戰車路士、利物浦同曼城,結果個頭開得唔好,為「足球天才」莫耶斯埋下死亡伏線。

新一季曼聯有望開個靚局,頭幾輪賽程勁輕鬆,當中有3場係對3支升班馬般尼、昆士柏流浪同李斯特城,好有機會先攞個5連勝!尹帥第1個考驗要等到第7輪,主場對「神奇球隊」愛華頓,而去到季尾4月先係魔鬼賽程,連對曼城、車路士同愛華頓,隨時影響爭標形勢。

第二輪上演曼城紅軍大戰

至於同市死敵曼城就真係「衞冕冠軍唔易做」,地獄之旅喺頭5輪就已經展開,首輪先要作客紐卡素,跟住再先後硬撼利物浦、史篤城、阿仙奴同車路士,真係惡踢到暈呀!而上季同曼城鬥到最後先輸咗個冠軍嘅利物浦開季賽程都唔易踢,第一場就會喺主場對修咸頓,新加盟嘅射手列基林拔即刻要倒戈鬥「聖人」,跟住連續兩場作客曼城同熱刺,另一爭標對手車路士頭兩輪先後對般尼同李斯特城兩支升班馬,對「寸王」莫連奴嚟講,easy job啦!