熄冷氣玩謝抽筋帝馬刺奇招滅火
馬刺「壞冷氣」奇招焗死「大帝」贏Game 1！馬刺昨日於主場與熱火上演今年總決賽首戰，由於球場冷氣失靈，場內溫度直逼攝氏32度以上，令到熱火「大帝」勒邦占士（LeBron James）熱到抽筋無法完成比賽，馬刺以110比95滅「火」先拔頭籌，LBJ抽筋被抬走的情景也被馬刺球迷恥笑。
馬刺球場的冷氣在比賽中途突然失靈，在場球迷即時將球場送的海報變成紙扇，但球員就未有這樣的「厚待」。LBJ在第3節已主動要求換出，當時左腳已明顯出現問題，第4節一次跳投失手後再次舉手，在後備席時表情痛苦，已經開始抽筋。馬刺在這時發力搶分，成功超前，迫使勒邦占士繼續「頂硬上」。惟完場前4分鐘一次剷籃得分落地後，「大帝」未有回防，左腳完全不能屈曲，要由職員抬走，只能在後備席看着球隊以15分之差慘敗。
占士被抬走 刺迷喪抽水
「大帝」占士上陣33分鐘攻入全隊最高25分，賽後稱自己第一次在沒冷氣的室內場打波。但馬刺老將真路比利（Manu Ginobili）就說：「以前成日都喺勁熱嘅環境打波，今次咁樣好小事啫。」雙方在香港時間周一再在馬刺主場上演Game 2，聯盟高層已「落柯打」在賽前要修好冷氣。
馬刺球迷「抽水」恥笑勒邦占士抽筋被抬走，不少網民有樣學樣扮「大帝」。運動飲品商佳得樂更於twitter留言狂寸「大帝」：「抽筋嘅球員唔係我哋啲客，我哋嘅球員絕對頂得住高溫！」