荷蘭兵揼本鋪草皮

荷蘭大軍今屆揀咗位處里約熱內盧嘅法林明高訓練中心作為基地，小記當然要去探營啦，個場仲有部分小工程進行緊，最重要嘅訓練場草地規格同馬拉簡拿球場完全一樣，荷蘭負責所有換草費用，真係夠晒揼本，但荷蘭分組賽冇一場喺馬拉簡拿度踢，惟一有機會就係決賽，唔通佢哋真係咁有信心？

小記去到法林明高訓練場探營時見到有工人整緊條樓梯，仲有油漆工人開緊工，負責人解釋呢啲都係小型工程，就算荷蘭嚟唔嚟都會進行定期翻新。呢個訓練中心夠晒大，淨係泳池都有五個，其中一個仲係專門舉行大賽，加埋體操館同網球場等設施，班兵一定唔怕悶親。

訓練場最緊要係草地質素，荷蘭揀場後馬上要求法林明高換草，指明要用馬拉簡拿球場同款嘅草地同泥土，費用由荷蘭全數支付。訓練場於今年三月進行換草工程，現時未完全搞掂，所以場內有部分光禿禿；不過荷蘭大軍於6月6日先至正式進駐呢個訓練基地，所以都應該趕得切交貨。