網壇天王費達拿除咗打網球叻，原來生孖Ｂ仲有心得！「瑞士天王」費達拿喺個人facebook宣布，太太米爾卡再次誕下雙胞胎囝囝，並且改埋名添，夾埋依家嘅一對孖女，湊成一家六口，真係幸福滿瀉。費達拿尋日喺「面書」簡訊中表示：「米爾卡同我實在非常開心，要同大家分享好消息，Leo同Lennny喺今朝已經出世喇！又係孖胎，真係奇迹呀！」
喺5年前嘅7月底，結婚唔夠4個月嘅米爾卡為費達拿誕下一對孖囡，費天王呢兩位千金近年都經常現身同爸爸打氣。呢位17個大滿貫單打冠軍，舊年聖誕於facebook宣布太太再次懷孕嘅喜訊，當時已經傳出第二胎可能都係雙胞胎，如今傳聞成真，仲剛好與兩個囡囡湊成兩個「好」字，不得不讚嘆費天王家族雙胞胎基因之強。
目前世界排名第4嘅費達拿，原本計劃參加ATP 1000馬德里大師賽，但喺當地時間周二上午通過facebook宣布退出比賽，寧願返屋企陪伴預產期提前嘅米爾卡。費天王當時仲提到自己未來幾星期都會同家人一齊度過，隨住兩個囝囝的出世，相信他會繼續退出剩餘嘅紅土熱身賽，隨時要等到法網開打先回歸。