群星匯聚比比最多女圍
C朗尋晚強勢登場前，主辦單位前日先搵五國球星招呼傳媒，分別有葡萄牙屠夫比比、巴西二打六路爾斯古斯達禾、法國新星華拉尼、英格蘭陽光男孩阿歷士張伯倫同克羅地亞人氣王莫迪歷，講到最出位，肯定係chok到癲嘅古斯達禾！
古斯達禾靠Chok出位
講星味，古斯達禾梗係輸幾條街啦，首日NIKE發布會個個球員都畀大批傳媒圍住，唯獨古斯達禾個「巴西部」冷冷清清，不過佢一有「Job」就即刻Chok到盡，自動波擺「甫士」搏突圍而出，雖然生意唔好，但起碼做到賓至如歸，口碑唔錯！
同人唔同命，比比係就係冇古斯達禾咁型，但正所謂「男人唔壞女人唔愛」，呢位皇馬茅柴場上立亂剷人犯眾憎，但查實佢勁有女人緣，在場都唔知幾多女記者爭住訪問佢，有位着藍衫嘅《Fox》電視台索爆女記者仲全程對住比比拋眉眼，古斯達禾唔恨得咁多啦！
而張伯倫就四萬咁口狂Sell陽光男孩Style，華拉尼就唔太識一心二用，叫佢拎波砵，佢就唔識望鏡頭，你叫佢望鏡頭咩，佢又會垂低對砵，表現仲勁生硬，得閒搵皇馬隊友C朗教你點做球星啦！
