傷兵拜林冧女至上 溜馬連敗冇眼睇
溜馬中鋒拜林（Andrew Bynum）因傷仍然休戰，就連主帥禾高（Frank Vogel）都未知其能否出戰季後賽。不過，拜林養傷期間仍不愁寂寞，更被傳媒發現經常去餐廳「打躉」，同靚女侍應交流甚至一齊睇波，完全懶理球隊死活。至於溜馬近期戰績亦陷入低迷，昨仗作客不敵騎士遭逢兩連敗後，隨時連東岸一哥位都保不住。
拜林因膝蓋積水而被溜馬宣布無限期休戰，主帥禾高日前被傳媒追問前者傷勢時支吾以對，只一再強調仍未知道拜林復出的具體時間，令人聯想到後者可能連季後賽都未必能夠上陣。不過，冇波打嘅拜林不愁寂寞，近期經常幫襯當地一間餐廳，更與女侍應打成一片，當然唔少得一齊合照同睇NCAA，難怪連八卦網站《terezowen》都寸爆拜林就好似住喺餐廳一樣，完全冇理過球隊死活。
至於溜馬近期戰績的確麻麻，球隊昨仗作客以76比90不敵騎士後錄得兩連敗，更被熱火追至只落後一場勝仗。溜馬直至昨日常規賽戰績為52勝22負，熱火則有50勝22負，如果熱火能夠勝出未打嘅兩場賽事，戰績就能追平溜馬。如果溜馬未能及時重拾正軌，東岸一哥位隨時拱手相讓熱火。
PP:堪薩斯新丁NBA選秀
另外，堪薩斯大學一年級前鋒韋堅斯（Andrew Wiggins）將宣布離校，預料佢將會提前結束大學生涯參加NBA選秀。至於NCAA四強亦順利誕生，康涅狄格大學將會對佛羅里達大學，肯塔基大學則對威斯康辛大學，四強戰將於香港時間4月6日展開廝殺。