大炒活塞76人向連敗說Bye

向最長連敗紀錄Say No，76人炒活塞爭口氣！已經連輸26場的76人，昨仗再輸的話，就會打破騎士於10至11球季及NFL球隊坦帕灣海盜於1977年創造的美國4大聯盟連輸場數最多紀錄，不過這支「東岸魚腩」就拒絕「名留臭史」，昨以123比98大炒活塞，賽後High到十足十捧走總冠軍一樣！

76人知恥近乎勇，昨仗有5位球員得分達雙位數，當中「新人王」大熱卡特威廉斯（Michael Carter-Williams）更貢獻「21+7+4」數據，帶領球隊爆冷於主場以25分之差贏波，自本年1月30日後再嘗勝果。

賽後全場76人球迷向球員起立致敬，更向客軍喊出「多謝活塞」口號，76人眾將亦圍圈慶祝罕有的勝利，教練賓特布朗（Brett Brown）表示：「睇到76人戰將咁團結好開心，我哋擁有一個5年計劃，未來定必會更強。」終止26連敗的76人，明日將造訪鷹隊。