塘鵝「恐怖Baby」嚇親自己友
「倒米」雙雄齊輸波！塘鵝繼恐怖吉祥物Pierre之後，日前再推出「恐怖Baby」賀新奧爾良節日「懺悔星期二」，但這隻公仔個樣認真騎呢，仲嚇到球隊昨日被快艇大炒。至於76人將球隊表現不俗的埃文特納（Evan Turner）交易到溜馬後，球隊變得毫無星味之餘，實力亦進一步下降，同日更被東岸「魚腩」公鹿狂炒20分，搞到入場球迷冇眼睇寧願「瞌一瞌」！
塘鵝今季改名推出的吉祥物Pierre，由於樣衰得太恐怖，搞到球會最終要在明星賽周末前推出Pierre 2.0版本去改善形象。不過，塘鵝日前為節日「懺悔星期二」推出的「King Cake Baby」又再出事，這個巨型BB瞪大眼的笑容十分恐怖，就連一眾啦啦隊索女同佢合照都被嚇到，笑得極為不自然。塘鵝球員未知是否被這巨型BB嚇到失魂落魄，昨仗對快艇時防守非常鬆散，最終主場以110比123大敗。
無星76人睇到球迷瞓着
至於76人將埃文特納交易走後，昨仗主場對公鹿更打出聯盟最差的防守水準，被公鹿射手美奧（O.J. Mayo）轟入7個3分球。76人最終以110比130輸波慘吞11連敗。這支毫無星味的球隊主場大敗，令坐在場邊位的球迷都睇到「瞌着」。