冬奧掀起「全民冰壺」熱潮，由英超球星、機場旅客，以至屋企大小朋友，一齊發揮無限創意，以日常家居用品，自創另類冰壺比賽！其中修咸頓孖寶積克確克同積洛迪古斯喺更衣室表演「人肉冰壺」，堪稱最搞鬼之作，唔知國際奧委會會唔會考慮將呢批「新發明」加入未來冬奧比賽項目呢？
有睇過冰壺比賽嘅朋友都會知道呢項賽事，需要喺專門冰道，用合乎規格嘅冰刷同冰壺比賽，一般人好難有機會接觸。不過愈難愈有吸引力，各階層人士紛紛投入其中，只要動些少腦筋，一樣可以玩餐飽。修咸頓後衞積克確克諗到化身「人肉冰壺」，踎上四輪平板車，向前衝行，隊友積洛迪古斯喺前方，用地拖捽地，扮晒引領「人肉冰壺」移動方向。兩人純粹玩嘢，但夠晒創意，贏得網民掌聲，片段立即喺網上瘋傳。
位處熱帶嘅巴西一樣可以參與其中，當地一位警察將水煲當冰壺玩，但就要先喺地上灑水幫助滑動，可以叫做「水壺」。另外，有人喺機場等上機時候，將有轆行李篋當成冰壺溜出，再用掃把刷地，最後仲要扮晒贏咗咁慶祝，認真投入。至於喺屋企一樣可以成為冰壺選手，用自動吸塵機充當冰壺，開動後用地拖開路，啱晒一家大細享天倫樂，仲可以順便打掃屋企，何樂而不為呢！