2014全明星周末下周六假新奧爾良開Show，NBA昨日公布各項賽事參賽名單，拓荒者控衞列拿特（Damian Lillard）破天荒玩足三日共五項賽事，並會喺被譽為近年最強戲碼嘅入樽賽，代表西岸挑戰衞冕冠軍泰倫斯羅斯（Terrence Ross）及保羅佐治（Paul George），今次全明星周末列拿特真係「玩晒」喎！
去季「新人王」列拿特踏足NBA第二年已火速躋身一線球星行列，繼入選「重頭戲」全明星賽及新星挑戰賽，昨日更被聯盟委以重任，應邀參戰今屆入樽賽、三分賽及技巧挑戰賽，成為聯盟史上首位玩足五樣全明星周末項目嘅球員。
對列拿特而言，最具挑戰性肯定非入樽賽莫屬，首次參戰嘅佢將擔大旗率領麥里摩亞（Ben McLemore）及班尼斯（Harrison Barnes）兩位西岸球員，挑戰由約翰禾爾（John Wall）、MVP熱門保羅佐治及衞冕「入樽王」泰倫斯羅斯組成嘅東岸部隊。聯盟為振興每況愈下嘅入樽賽，今次係繼1988年以來首次挑選三位全明星球員（保羅佐治、約翰禾爾、列拿特）參戰，加上新賽制加入「90秒無限鋤樽」及「單挑」新元素，可謂噱頭十足！