占士蒲吧被查身份證
勒邦占士（Lebron James）可謂知名度最高的NBA球星之一，但總有例外的時候。「大帝」尋日領軍作客魔術，賽前一晚去酒吧睇大學美式足球賽時，竟然被工作人員查身份證。
據《邁阿密哨兵報》稱，作為俄亥俄州大學球迷的勒邦占士，於賽前一晚在球隊所住賓館的酒吧睇Orange Bowl賽事，當時更沒有告訴任何人自己是誰，難怪當被查身份證時當場驚呼：「你冇睇到我啲鬍鬚咩？」「大帝」更於昨日熱火對魔術賽前向媒體自爆這件囧事，同時笑稱：「好耐冇遇到呢啲事，哈哈。」
作客魔術早段失準
不過，勒邦占士於對魔術的開局表現差勁，一度7投只得1中，難怪有現場記者即時於Twitter說道：「唔通啲侍應喺占士杯嘢度『加咗料』，等佢到今日比賽都未瞓醒？」但隨住比賽繼續進行，「大帝」逐漸找回狀態，全場貢獻「15+8+8」的「準大三元」，協助球隊最終作客以110比94輕取魔術。
今仗獲15分的勒邦占士更以連續527場常規賽得分達雙位數，超越傳奇巨星摩西斯馬龍（Moses Malone）排於史上第四位。至於輸波的魔術明早將作客快艇，自然希望終止連敗。
（廣東體育周二早上11時30分直播）