塞爾特人近日推出嘅2014年曆，竟然有今夏離隊加盟籃網嘅加納特（Kevin Garnett）作為封面嘅版本，唔少球迷喺twitter留言話實在不可思議，如果唔係印刷錯誤，唔通係波士頓人太掛住呢位老將？
紐約人有個狂熱粉絲，竟然將JR史密夫（JR Smith）條頸嘅紋身紋到自己條頸做聖誕禮物，更上載到twitter，JR史密夫見到更加以「吶喊」作回應。
美媒《ESPN》今季頻頻擺烏龍，日前刊登一段溜馬中鋒希拔（Roy Hibbert）嘅新聞，竟配錯一張「二打六」馬軒美（Ian Mahinmi）嘅照片，搞到希拔喺twitter都話自己好Hurt。