熱火中鋒保殊（Chris Bosh）尋日對帝王後接受訪問時畀隊友「搶鏡」，今次主角係勒邦占士（LeBron James）同韋迪（Dwyane Wade）。占士首先抬住韋迪兩隻腳喺後面推，韋迪就用手撐住地面係咁爬，睇落好似「大帝」推住部剪草機。
NBA官方用籃球喺過去30年只係出現過一個名，就係總裁史端（David Stern）。不過，出年2月1日將會有所改變，籃球上史端個名將會變成新總裁阿當施華（Adam Silver）。據報道有啲籃球已經印咗阿當施華嘅簽名，好似「試業」咁出現，例如喺籃網嘅訓練場館入面。
快艇後衞班尼斯（Matt Barnes）由於接受左眼視網膜手術已經抖咗成個月，佢尋日終於現身訓練場，而且獲醫生批准可以比賽。不過，班尼斯要戴住護眼鏡上陣，一眾隊友都認為護眼鏡冇影響到班尼斯嘅投籃，只係覺得佢外形有啲搞笑。