格電王路達衝9冠失敗

赫徹臣征戰7年首奪標

路達雖然只排第二出戰，但有個好開始，第三圈喺葡京彎越過排頭位嘅赫徹臣後，原本以為佢會放紙鳶奪得澳門嘅第九冠，點知同胞赫徹臣同樣打不死，喺第五個圈轉入漁翁彎直路時，利用速度壓過路達。

二人一路鬥得難分難解，同埋第三位嘅另一英國車手莊遜超晒班，去到第十二圈，三人已經比其他車手快一個圈，赫徹臣首先越過車群，但路達被車群所阻，赫徹臣就利用呢個優勢帶返終點，贏得首個澳門東望洋賽道嘅冠軍。路達衞冕失敗，但賽後話唔會氣餒，明年捲土重來。