為慶祝澳門大賽車60周年兼保時捷911誕生50周年，保時捷特別邀請阮馬素做頒獎嘉賓，第一次踏足澳門嘅阮馬素，被車迷認出後爭相合照。
男神祝福 班博勒布包Q
阮馬素亦喺保時捷卡雷拉盃開賽前，專登搵班博同勒布合照，但就冇搵排頭位嘅日本車手澤圭太影相，問佢係咪二人fans，佢話自己係保時捷粉絲：「我擁有一部PorscheCayman S，其實我好鍾意極速運動，曾經揸到280公里，好爽。」阮馬素話自己經常留意賽車新聞，話澳門大賽車氣氛好好。
賽前大家都認為呢場車會由排頭位出賽嘅澤圭太「放紙鳶」贏出，但唔知係咪得到「男神」嘅祝福，班博同勒布喺賽事之中，雙雙追過澤圭太分列冠亞軍，澤圭太只得第四。