名人出自傳成風，跑出人類極限嘅保特唔執輸，呢名出名「爛蒲」嘅飛人喺最新自傳《Faster Than Lightning》中大談「性經」，更自爆成名後成日畀索女「圍攻」，甚至連荷里活影星珊迪娜布洛及德國名模克盧姆都「冧佢」，成個情場「鬼見愁」咁得戚！
保特出世時父母冇結婚，佢自爆同老竇好啱傾：「有時打電話返去，我哋話題都離唔開大家嘅性生活。成名後我每次蒲吧都成籮靚女任揀，感覺似細路仔入咗糖果舖咁開心。」
其中一次難忘經歷在荷里活，保特喺比華利山晚飯後，巧遇珊迪娜布洛與克盧姆，兩位美女主動邀約，當晚大家跳舞、飲香檳玩到忘晒形，但佢就話覺得有「遺憾」：「我哋當晚冇下文，不過老實講，如果有下文就好喇！」保特自爆從冇為比賽禁慾：「我好清楚要跑得快就必須要做愛！」
撇除一系列「性經」內容，剛入選年度最佳男子運動員最後三強嘅保特喺自傳亦有分享「食經」，大爆08年京奧因為覺得中國菜「奇怪」，故一日三餐都食麥樂雞，估計10日總共食咗1,000件雞！