【本報綜合報道】ＮＢＡ常規賽未開鑼，杜蘭特（Kevin Durant）與韋迪（Dwyane Wade）先開戰！繼早前批評韋迪未夠班躋身《體育畫報（SI）》公布的新季Top10後，ＫＤ繼續向「閃電俠」窮追猛打，揶揄對方「阻住地球轉」及「係時候交棒」，韋迪昨日就喪入25分率領熱火以121比96大炒馬刺，用行動證明寶刀未老！
事緣雷霆球星杜蘭特對韋迪入圍《SI》新季10大球星排行榜滿肚怨言，認為舊隊友、現効力火箭的占士夏登（James Harden）更有資格入選，日前接受《Eurohoops》訪問時，ＫＤ又試挑釁韋迪：「韋迪係偉大球員，但人老咗就應該讓位，咪阻住班後生上位，不如交棒畀新一代嘅球員啦！」
被踩到上心口，韋迪惟有用行動還擊，昨日就貢獻全場最高的25分，帶領熱火大勝馬刺25分，相信韋迪於明年1月30日的常規賽硬撼由杜蘭特領軍的雷霆實有好戲睇。