配合適當髮型效果更好

曾為唔少明星藝人化妝嘅Akira,都對安儀臉相讚不絕口:「今次嘅形象設計,我想呈現佢比較女性化同埋青春少艾嘅一面,呢個妝偏向自然,平時出街聚會都唔會太誇張!

首先講下佢嘅膚色有啲偏黑,所以眼窩位我揀左啡金色系眼影做配襯。至於髮型方面,因為佢本身頭髮比較薄,放曬落嚟無咁好睇,我為佢中間嘅頭髮夾咗俗稱粟米嘅小波浪紋,達致小小蓬鬆效果,令整體髮型更立體、有層次感。

另外,雖然佢平時係左邊分界,但我依家將佢撥去右邊,咁就可以隱藏咗眉毛有小小瑕疵,令妝容更加完美。安儀話我知佢怕劉海遮眼會阻擋視野無咁方便,於是我幫佢將前面頭髮打個圈撥上頭頂,咁嘅造型除咗比較清爽外,亦都令臉形睇上去更修長!」