勒邦占士剃光頭辟邪

熱火球星勒邦占士(LeBron James)近期可以話係黑氣纏身,先有借警車開路去睇演唱會被查,之後又有艷星企出來大爆當年點請佢食檬檸,美媒更批評占士得意忘形,已被名利沖昏頭腦。唔知係咪「大帝」都覺得呢排諸事不順,索性將頭髮剪短到接近光頭,睇嚟有意換個新look轉轉運喎!

占士之前喺Instagram上載佢同未婚妻去睇Jay-Z同Justin Timberlake演唱會時獲警車護送逆線行車,搞到畀球迷「狂插」,話佢冇特權運用警力。邁阿密戴德警局之後發聲明,話經調查證實呢件事並非預先安排,已經違反相關規定,將繼續深入調查,唔排除有人會被罰,矛頭似乎直指「大帝」。

占士畀警車護送呢單嘢隨時搞到一身蟻,有位叫Carmen Ortega嘅艷星就乘機抽水,近日向著名八卦網站《Bossip》爆料,話「大帝」曾經喺洛杉磯某夜店向佢搭訕,但最終決定請佢食檸檬。Carmen Ortega表示「大帝」向佢隱瞞同其他人嘅關係,令佢覺得自己畀人當傻婆咁呃得就呃。

艷星自稱曾向大帝派檸

唔知係咪覺得近嚟黑氣纏身,再加上一向受髮線向後移嘅困擾,「大帝」把心一橫決定轉新形象。由最新曝光嘅照片睇到,占士嘅新髮型幾乎係光頭,留低嘅頭髮部分非常短。唔少媒體皆盛讚占士呢個新look,更提議佢加入光頭行列,亦有媒體指佢同米高佐敦(Michael Jordon)嘅差距因為呢個光頭look拉近好多。

不過,唔少媒體都批評占士近期場外作風唔係聯盟頭號球星應有嘅態度,由逆線行車到炫耀自己24小時都有私人DJ跟住,種種迹象顯示占士連連奪冠成為NBA代言人後開始得意忘形。有媒體更指米高佐敦只會為訓練着急,唔會為其他私事勞師動眾,暗諷占士同「波神」仲有好大差距,相信「大帝」係時候要諗諗自己近來嘅行為有冇過火。

本報綜合報道