高比拜仁（Kobe Bryant）就快又做老竇？啱啱先去完米蘭醫腳嘅「小飛俠」，趁住休季期氹老婆，由意大利飛到去法國巴黎同雲妮莎（Vanessa Laine）會合，兩公婆仲喺艾菲爾鐵塔前面整番張咀嘴合照添，之後高比放相上instagram時仲加咗句充滿玄機嘅留言，似乎暗示就快又做老竇喎！
呢位湖人球星喺相片描述加咗句「#3rd bimbo:)?」，「bimbo」嘅意大利文解釋就係小朋友咁解，但後面又有個問號，證明「小飛俠」都唔太sure雲妮莎係咪有咗，但照高比咁樣留言，斷估佢兩公婆最近都係「努力造人」中。
唔少Fans睇到高比仔嘅留言都戥佢開心，由於高比已有兩個女，所以有人希望呢胎係仔仔，咁第時就可以繼承「小飛俠」嘅衣鉢喇。