火箭名宿同賀超人加盟
「超人」杜域侯活（Dwight Howard）空降休斯敦畀球迷「當神咁拜」。火箭昨吹雞召集姚明（Yao Ming）、奧拉祖雲（Hakeem Olajuwon）及德斯拿（Clyde Drexler）等「神級」名宿撐場，喺豐田中心拱照侯活。由過街老鼠變「萬人迷」，難怪「超人」心情靚爆，豪言全力助火箭爭奪總冠軍！
專程由北京到休斯敦嘅姚明，就睇好「超人」可以喺火箭發熱發亮。火箭官網同時將杜域侯活的12號波衫「上架」。火箭ＣＥＯ布朗同時透露，新季季票銷量激增20%，亦有指電視台準備增加火箭嘅轉播場次，足證「超人效應」好驚人。