Victoria 玩得好high
上集《炎夏冷運動》介紹過花式滑水（Wakeboard），但有唔少女讀者都問，有無更簡單兼易學嘅水上運動啱玩？我哋決定將呢個問題轉介畀「滑浪達人」教練Bosco，佢就話滑水界有件「神物」叫水上飛氈，最犀利之處係滑浪者可以乜都唔使識，都可喺水面飛翔！咁堅？咁就要搵番個連游水都唔識嘅靚女譚詠怡（Victoria）試玩，睇吓坐上呢張水上飛氈後，係唔係會曉飛先！
炎炎夏日就梗係想出海，但唔識游水就有好多嘢玩唔到，好彩仲有樣嘢叫水上飛氈，可以幫到自認運動白癡嘅朋友喺水上飛馳，感受到滑水有幾咁High！就好似Victoria咁，平時唔做運動之餘，仲「十指不沾陽春水」，簡直係「孱過孱仔強」，所以搵佢嚟做樣辦玩水上飛氈，如果咁都玩得掂就證明確係好易上手！
任由架快艇拉住走
教練Bosco喺開船出海前，只係教咗Victoria兩樣嘢，第一就係要着救生衣防止浸親，第二樣係喺過程中揸實飛氈上個手柄，任由架快艇拉住走，乜都唔使做咁簡單！起初Victoria因唔識游水，所以落水嗰吓顯得好驚、好緊張，但見到個飛氈可以四平八穩咁浮喺水面，都增加咗唔少信心。
直到快艇開動拖行，飛氈上嘅Victoria依然咁穩定，最終喺水面滑行玩咗十幾分鐘，感受到極速暢快刺激之餘，只係濕咗少少髮尾，就知係呢項運動既安全又易玩！
Victoria成功試玩後都覺得好Amazing：「無諗過唔識游水嘅我竟然可以滑到水，再加埋本身我係超級細膽，雖然過程中勁驚，但穩定咗之後就覺得好刺激。經過今次之後，我會的起心肝學游水，因為除咗可以『升呢』玩Wakeboard之外，仲可以練好啲身手，將來要拍動作片都無問題。」
撞正逆風彈離水仲激
不過，教練Bosco就話原來Victoria咁易Pass係因為錫住佢：「對於初學者嚟講，我哋只係拖住佢滑行試玩，所以難度好低。如果再想刺激啲，可以試吓坐、跪、甚至企喺飛氈上，好Higho架！如果撞正逆風一刻，成張飛氈仲會彈起離開水面『飛行』，到時真係曉飛嘞！」
起水3部曲
第1部：着好救生衣，即使唔識游水又遇到意外，都可以靠佢救命。
第2部：
飛氈落水之後，只需要趴喺上面，雙手緊握把手。
第3部：
快艇開動後，飛氈被拖在水上滑行，最安全係保持俯臥狀態，但亦可挑戰坐、跪、甚至企呢啲更高難度動作。
裝備知多啲
救生衣：
玩者必備之物，為配合年輕玩家，現時設計多採用鮮艷顏色，也有專為女士設計款式。
水上飛氈：
令不懂游泳的玩家也能享受滑水樂趣，特點係穩定性強。
水上活動常識注意
由於海水未必乾淨以及是鹹水，故每次出海後記得沖身。
無論甚麼運動前，開始前都要做足熱身，而且拉筋也很重要。
香港水域繁忙，任何人士嚴禁在速度限制區內進行滑水運動。
不要在淺於1.5米水深海域滑水。
不可向其他船隻或碼頭方向進行滑水運動，要與其他船隻保持平衡及距離。
鳴謝：Island Wake（28950022）
圖、文：司徒子文