網球波霸縮胸建奇功
網壇「縮胸少女」施蒙娜勇奪職業生涯首冠！羅馬尼亞美少女施蒙娜五年前喺法網憑34DD勁爆身材狂吸大量男粉絲，不過，為咗成為頂級球手，佢09年不惜進行縮胸手術減輕「負荷」，犧牲終於換來回報，喺剛過去嘅周日，施蒙娜喺紐倫堡網賽戰勝德國新星柏高域，奪得出道以來首個WTA冠軍，成為真正好波之人！
施蒙娜喺紐倫堡女單決賽面對東道主球手柏高域，成功以直落兩盤6比3擊敗對手，過程輕鬆，呢位羅馬尼亞球手賽後興奮表示：「我永遠唔會忘記呢場勝仗，呢個係我首個WTA冠軍，真係難以置信！」
施蒙娜「術後」排名飆升450位
現年21歲嘅施蒙娜早於08年法網嶄露頭角，佢當年成功奪得少年組女單冠軍，不過，相比起場上戰績，施蒙娜嘅勁爆上圍更令人難忘。施蒙娜17歲時已擁有34DD身材，經傳媒報道後，唔少男粉絲迷上呢位巨胸女將，但呢點反而成為佢打網球最大障礙，事關巨胸為佢帶來沉重壓力，令其背部成日枕住痛，而且跑動時會出現「拋胸」情況，比賽時影響極大。
施蒙娜喺09年決定進行縮胸手術，將34DD縮至34C，之後戰績不斷冒升，世界排名上升超過450位，今次奪冠後將升至45位，前途一片光明。