正所謂「輸波都要贏造型」，依家喺世界網球壇球員要「上位」，球技當然重要，但一套搶鏡戰衣絕不可少，特別係大滿貫更加係一場Fashion Show。法網選擇喺巴黎呢個世界時裝之都舉行，球員踏上羅蘭加洛斯球場就如走上「紅地氈」，首圈賽事後不少網站為今屆參賽球員嘅戰衣作品評，威廉絲姊妹一個被彈、一個被讚，「大威」V威廉絲的「粉紅睡衣LOOK」廣受劣評，而舒拉寶娃就列入「The Best」之列。
法網首周差不多結束，《tennis.com》及《SI》(美國體育畫報)都分別為今屆參賽法網的球員戰衣作點評，世界「一哥」、「一姐」都被列為「The Best」，祖高域嘅粉藍色上衣配白色短褲配搭，紅土上有一種舒服感覺，可見贊助商Uniqlo花過心思為「一哥」設計，而「細威」S威廉絲的寶藍色DEEP V連身裙配上橙色打底褲及頭巾嘅配搭，亦相當搶鏡。舒拉寶娃及伊雲娜域兩位網壇靚女亦受到讚賞，舒拉寶娃嘅直身裙設計雖然簡單，但紫色加白色盡顯美少女嘅青春氣色。
不過，今屆亦有唔少「騎呢」服裝，首選必然喺首圈被OUT嘅「大威」Ｖ威廉絲，貴為時裝設計師嘅佢今次都算失手，深粉紅嘅長袖上衣配上淺粉紅四個骨緊身褲，但中間又有一截粉紅色網球裙，配搭認真「騎呢」，難怪被評為今屆法網「最劣」設計，而蒙菲斯的「花綠綠」上衣亦入選「The Worst」，值得一提是一向衣着優雅嘅瑞士天王費達拿及野性嘅拿度，都被批評，《SI》認為費天王嘅戰衣太過普通，完全趁唔起費達拿嘅星味，拿度嘅新戰衣亦唔夠鮮色，過為平淡。
講起費天王，尋日喺法網第二圈順利過關，輕鬆以6比2、6比1、6比1擊敗印度的戴華文，闖入男單32強，同時將佢喺羅蘭加洛斯嘅贏波紀錄改寫至56場，僅次於阿根廷韋拿斯及佩查基利所保持的58場，費達拿賽後話：「我覺得表現唔錯，前兩場比賽都打出侵略性，打得積極。」呢位二號種子下一圈將與法國本土球手貝內托爭逐。
本報綜合報道