保羅佐治率溜馬撲火

熱火大戰溜馬的季後賽東岸決賽明早開火,焦點必屬應屆最佳進步球員保羅佐治(Paul George)大戰常規賽MVP勒邦占士(LeBron James)!昔日在場上淪為笑柄的保羅佐治,今季靠抄高比拜仁(Kobe Bryant)訓練方式殺出新血路,明日在Game 1挑戰「大帝」將迎接職業生涯最大考驗!

據保羅佐治胞姊Teoisha憶述,保羅佐治10歲時連波褲都無條,但又想到打籃球,故此就匆忙於場邊將條牛仔褲剪成短牛,然後便落場打餐飽,奈何就遭其他小朋友恥笑「傻仔」而喊足成個禮拜。昔日球場笑柄今季以場均17.4分、7.6個籃板及4.1次助攻數據,勇奪最佳進步球員獎,踏足NBA第3季就躋身球星行列,保羅佐治透露大爆發皆因高比拜仁。

保羅佐治於印第安納波利斯電台節目《1070 the Fan》中表示:「溜馬助教梳爾係前湖人教練之一,季初我叫佢將高比嗰套訓練方式套落我度,操練同比賽前練300至400次投籃、瞓晏覺、凌晨踩單車等等,果然對我嘅體能同場上表現有好大幫助。」

大帝讚保羅仔防守叻

比起新秀賽季長高2吋至現時6呎10吋的保羅佐治,乃聯盟最佳防守球員之一,明早將與其交手的「大帝」賽前就指保羅佐治難應付:「保羅佐治手臂長、體能勁、判斷能力好,係我見過嘅最佳球員之一,東岸4強已經嘜得安東尼(Carmelo Anthony)好成功。」

至於有足足1星期時間備戰的熱火,近日特登由訓練場移師到美航球場練波,以免球員失去比賽節奏,不過明早Game1讓到防守出色的溜馬8.5分略嫌太多,寧捧下盤。

(now635周四早上8時30分直播)