愛妻誕孖女陳國明驚喜交集
香港桌壇「金銅子」陳國明一星期前「升呢」做爸爸，惟愛妻阿Kit生B後卻因失血過多，需立即在產房接受搶救，更一度要入深切治療部（ICU），令他飽食驚風散！「國明」坦言經歷了人生最開心和最恐懼時刻，學懂珍惜眼前人。
明嫂失血過多要瞓ICU
「明嫂」上周一傍晚剖腹誕下孖女後，至翌日凌晨合共輸了10多包血，再進行兩個多小時間止血手術，然後瞓足3晚ICU……陳國明憶起當日情景餘悸猶存：「過去呢7日感受到母親嘅偉大，我一世都會記得！我想代表對孖女對太太講聲母親節快樂，佢兩個長大之後，我一定會講佢哋知，媽媽有幾咁勇敢、偉大。」連日來頻撲又擔心，「國明」表示4日只睡了12粒鐘，全冇胃口，成個人「瘦晒」：「阿Kit仲要觀察，未知幾時出得院，不過情況總算穩定。」他透露稍後會找玄學家為孖女改名，且盼兩姊妹健康、快樂成長。